Kullat e gjykatës së kontesë Grant me tulla të kuqe, lartësohen mbi sheshin kryesor të Lancasterit. Njerëzit shpenzojnë para dhe kohë në butikë, argjendari, farmaci dhe restorante.
Dick Becker është optimist për qytetin e lindjes, Lancasterin, në jugperëndim të Wisconsinit, por edhe për gjithë vendin, teksa Presidentin Donald Trump po punon që të lë gjurmët e tij në Washington.
“Duhet t’i japin një shanc!” thotë ai.
Sipas Beckerit, një shumicë votuesish në këtë rajon kanë qenë pro Trumpit, një kandidat republikan, pasi donin ndryshimin. Ai shton se shumë të tjerë më parë, që kanë dashur gjithashtu që gjërat të ndryshonin duke zgjedhur President Obamwn, mbetën të zhgënjyer nga puna e tij.
“Njerëzve me të cilët kam folur nuk u pëlqente si po shkonin gjërat,” thotë ai. “Njerëzve u kishte ardhur në majë të hundës nga politika dhe donin një ndryshim.”
Sa i takon Presidentit Trump? “Shpresoj që njerëzit ta mbështesin, sepse po i shkuan mirë gjërat atij, atëherë do ma shkojnë mirë të gjithëve” përgjigjet Becker.
Dick Becker, punonjës në Walker’s Clothing and Shoes, thotë se gjërat po ecin shumë mirë në Lancaster, Wisconsin dhe në gjithë kontenë e Grantit.
Vota e banorëve të zonës nuk u diktua nga ndonjë gjendje e dëshpëruar, thotë Becker, sepse gjërat po shkojnë shumë mirë në Kontenë e Grantit.
Kur ai shikon jashtë nga dritarja e butikut Walker’s Clothing and Shoes, ku punon si shitës, Beckeri shikon gjykatën e lartë, ndërtuar me tulla të kuqe, e cila hepohet mbi sheshin qëndror të Lancasterit. Në rrugë, ai sheh njerëz rreth e rrotull që shpenzojnë kohë dhe para në dyqanin e tij, në një butik bizhuterish, farmaci, dyqane dhuratash dhe restorante.
Shumë njerëz nga zonat rurale parapëlqejnë të udhëtojnë mbi një orë për t’u argëtuar dhe për të bërë pazar në dyqane të mëdha pse qendra tregtare.
Por Beckeri thotë se Lancasteri, me një popullësi prej 3,868 banorësh, e ka ndryshuar këtë trend deri diku, duke i tërhequr njerëzit që jetojnë larg, si fjala bie në kryeqytetin e Wisconsinit, Madison, që të blejnë ato çka ai i quan “mallra të cilësisë së larë” në butikun “Walker” dhe dyqane të tjera që ofrojnë gjithashtu hijeshinë dhe dashamirësinë tipike të dyqaneve të qyteteve të vogla, diçka që nuk para e ndesh në dyqanët e mëdhenj apo qendrat tregtare. “Askund nuk e gjen shërbimin dhe cilësinë e këtushme”, thotë Beckeri.
Por punët shkojnë fjollë në Lancaster, deri në njëfarë pike në kurriz të qyteteve të tjera të vogla të zonës, ku vetëm disa dyqane mbahen ende në këmbë.
Ajo që e ka sjellë gjithë këtë mirëqënie të përgjithshme të Kontesë së Grantot, thotë Becker, është zhvillimi ekonomik, nxitur fillimisht nga fondet federale dhe shtetërore, të cilat tërhoqën disa fabrika të vogla në zonë, duke hapur kësisoj qindra vende pune dhe duke rritur fuqinë blerëse të vendasve.
Por Konteja e Grantit përjeton të njëjtin polarizim politik si gjithë pjesa tjetër e vendit dhe ka shumë zëra kritikë ndaj Presidentit Trump.
“Njerëzit nuk e tolerojnë mendimin ndryshe të tjetrit”, thotë Becker. “Disa nga njerëzit e kandidatëve që humbën në zgjedhje po bëjnë gjithçka munden për të hedhur baltë mbi presidentin aktual”.
Edhe banorë të tjerë të zonës ndajnë të njëjtin mendim me Beckerin sa i takon përçarjes politike. Disa i dalin në mbrojtje Presidentit Trump, duke argumentuar se ai është një biznesmen që flet haptazi dhe të tjerë e dënojnë me forcë për retorikën e ashpër dhe planet e tij që mund të minojnë shërbimet shoqërore, nga të cilat përfitojnë ata që nuk po munden të përparojnë.
Becker thotë se edhe ai nuk i ka pëlqyer disa deklarata të ashpra te Presidentit aktual, por preferon të përqëndrohet në anët e tij pozitive.
Gjithë mirëqënia e Kontesë së Granti është mundësuar nga zhvillimi ekonomik, nxitur fillimisht nga fondet federale dhe shtetërore, të cilat tërhoqën disa fabrika të vogla në zonë, duke hapur kësisoj qindra vende pune.
“Jam dakord me atë që thotë Presidenti Trump, që dëshiron ta shikojë biznesin të kthehet sërish në Amerikë”, thotë Becker. E njëjta gjë vlen edhe për politikat mbi energjinë, një diskutim i rëndësishëm në zonat rurale, ku punët në ferma kanë nevojë për karburant dhe nitrogjen nga gasi natyral për fertilizim dhe shpesh njerëzve u duhet të bëjnë një rrugë të gjatë për të marrë disa shërbime.
“Presidenti Trump do që të shfrytëzojë më mirë rezervat tona të energjisë,” thotë Becker. “Kjo gjë më pëlqen, sepse nuk dua që paratë tona t’u shkojnë vendeve të tjera. Pse të blesh naftë në Iran apo Venezuelë, kur ke naftën tënde?”.
Por Becker, si shumë njerëz të tjerë në rajon, thotë se nuk i pëlqen shumë të merret me politikë me fqinjët dhe miqtë; preferon të shmangë debatet dhe të jetojë në një komunitet në harmoni.