7 តុលា 2001
កងទ័ពអាមេរិកចាប់ផ្តើមទម្លាក់គ្រាប់បែកប្រឆាំងកងកម្លាំងរបស់ក្រុមតាលីបង់នៅក្នុងប្រទេសអាហ្វហ្គានីស្ថាន ដោយមានការគាំទ្រពីសម្ព័ន្ធមិត្ត 136 ប្រទេស។
17 មេសា 2002
ប្រធានាធិបតីសហរដ្ឋអាមេរិក លោក George W. Bush ស្នើសុំជំនួយជាទឹកប្រាក់រាប់លានដុល្លារតាមរយៈជំនួយរបស់អាមេរិក ដើម្បីស្តារប្រទេសអាហ្វហ្គានីស្ថានឡើងវិញ។
23 ឧសភា 2005
ប្រធានាធិបតីអាហ្វហ្គានីស្ថានថ្មីដែលទើបជាប់ឆ្នោតលោក Hamid Karzai ចុះហត្ថលេខាព្រមព្រៀងជាមួយលោកប្រធានាធិបតី Bush ដោយអនុញ្ញាតឱ្យកងទ័ពអាមេរិក ផ្តល់ជំនួយផ្នែកយោធាដល់ប្រទេសអាហ្វហ្គានីស្ថាន។
កក្កដា 2006
ការបះបោរហិង្សាកើតមានទូទាំងប្រទេសអាហ្វហ្គានីស្ថាន ដូចជាការកើនឡើងនៃវាយប្រហារដោយគ្រាប់បែកអត្តឃាត និងគ្រាប់បែកបញ្ជាឱ្យផ្ទុះពីចម្ងាយ។
17 កុម្ភៈ 2009
លោកប្រធានាធិបតី Obama បង្កើនកម្លាំងយោធាអាមេរិកនៅអាហ្វហ្គានីស្ថាន
ប្រធានាធិបតីថ្មីរបស់សហរដ្ឋអាមេរិកលោក Barack Obama ប្រកាសផែនការបញ្ជូនទាហានអាមេរិកចំនួន 17,000 នាក់បន្ថែមទៀតទៅប្រទេសអាហ្វហ្គានីស្ថាន។
1 ធ្នូ 2009
លោកប្រធានាធិបតី Obama ប្រកាសការបង្កើនកងកម្លាំងយោធាអាមេរិកបន្ថែមទៀតនៅប្រទេសអាហ្វហ្គានីស្ថាន ដែលធ្វើឱ្យចំនួនកើនស្ទើរបីដង ជិត 100,000 នាក់។
1 ឧសភា 2011
Bin Laden ត្រូវបានសម្លាប់ដោយទាហានអាមេរិក
មេដឹកនាំក្រុម Al-Qaida ដែលជាអ្នកទទួលខុសត្រូវលើព្រឹត្តិការណ៍ភេរវកម្ម 11 កញ្ញា ត្រូវបានសម្លាប់ក្នុងប្រទេសប៉ាគីស្ថានដោយកងកម្លាំងយោធាអាមេរិក។
27 ឧសភា 2014
លោកប្រធានាធិបតី Obama ប្រកាសផែនការស្តីពីកាលកំណត់នៃការដកកងកម្លាំងយោធាអាមេរិកចេញពីអាហ្វហ្គានីស្ថានឱ្យបានច្រើនបំផុត ត្រឹមចុងឆ្នាំ 2016។
13 មេសា 2017
អាមេរិកទម្លាក់មហាគ្រាប់បែកដ៏ប្រល័យ
សហរដ្ឋអាមេរិកបានទម្លាក់គ្រាប់បែកដែលមានកម្លាំងខ្លាំងបំផុត ដែលមានឈ្មោះថា មហាគ្រាប់បែក ឬ Mother of all Bombs លើតំបន់ក្រុមយោធាបះបោររដ្ឋឥស្លាមដែលសង្ស័យថាលាក់ខ្លួននៅតាមរូងឬល្អាងភ្នំ នៅភាគខាងកើតប្រទេសអាហ្វហ្គានីស្ថាន។
21 សីហា 2017
លោកប្រធានាធិបតី Trump បង្កើនកម្លាំងយោធាអាមេរិក
ប្រធានាធិបតីថ្មីរបស់សហរដ្ឋអាមេរិកលោក Donald Trump បានបង្កើនចំនួនកម្លាំងយោធាអាមេរិកក្នុងប្រទេសអាហ្វហ្គានីស្ថានពី 8,500 នាក់ ដល់ 14,000 នាក់។
4 កញ្ញា 2018
មន្រ្តីកាទូតជើងចាស់លោក Zalmay Khalilzad ត្រូវបានតែងតាំងជាទីប្រឹក្សាពិសេសរបស់អាមេរិក ទទួលខុសត្រូវលើការបង្កើតដំណើរការសន្តិភាពអាហ្វហ្គានីស្ថាន។
7 កញ្ញា 2019
លោកប្រធានាធិបតី Trump ប្រកាសតាមរយៈបណ្តាញសង្គម Twitter ថាលោកលុបចោលផែនការជំនួបរវាងមេដឹកនាំតាលីបង់និងប្រធានាធិបតីអាហ្វហ្គានីស្ថាន នៅតំបន់ Camp David ដើម្បីអនុម័តលើកិច្ចព្រមព្រៀងសន្តិភាព។ លោកប្រធានាធិបតី ពន្យល់ថា លោកលុបចោលកិច្ចចរចារកសន្តិភាពនេះ ដោយសារតែមានការវាយប្រហារថ្មីៗ ដែលបណ្តាលឱ្យទាហានអាមេរិកម្នាក់ និងមនុស្ស 11 នាក់ផ្សេងទៀតស្លាប់។
29 កុម្ភៈ 2020
សហរដ្ឋអាមេរិកនិងក្រុមតាលីបង់ចុះហត្ថលេខាលើផែនការកំណត់ពេលដកកងទ័ពអាមេរិកចេញពីអាហ្វហ្គានីស្ថាន
សហរដ្ឋអាមេរិកនិងក្រុមតាលីបង់ បានចុះហត្ថលេខាក្នុងរដ្ឋធានីដូហា ប្រទេសកាតា ដើម្បីកំណត់ផែនការពេលវេលាដកកងទ័ពអាមេរិកចំនួន 13,000 នាក់ ដែលកំពុងមានវត្តមាននៅអាហ្វហ្គានីស្ថាន និងការសន្យារបស់ក្រុមបះបោរនេះថា នឹងកាត់បន្ថយការវាយប្រហារមកលើពលរដ្ឋអាមេរិកាំង។
កញ្ញា 2020 - កុម្ភៈ 2021
កិច្ចខំប្រឹងប្រែងឱ្យមានកិច្ចចរចារវាងរដ្ឋាភិបាលអាហ្វហ្គានីស្ថាននិងក្រុមតាលីបង់ក្នុងប្រទេសកាតា ត្រូវបានធ្វើឡើងជាច្រើនលើកច្រើនសា ប៉ុន្តែមិនបានលទ្ធផលអ្វីនោះទេ។ ប្រធានាធិបតីអាហ្វហ្គានីស្ថានលោក Ashraf Ghani បដិសេធសំណើបង្កើតរដ្ឋាភិបាលចម្រុះ ខណៈក្រុមតាលីបង់ក៏បដិសេធសំណើបទឈប់បាញ់។
14 មេសា 2021
ប្រធានាធិបតីអាមេរិកលោក Joe Biden ថ្លែងថា កងកម្លាំងយោធាអាមេរិកដែលនៅសេសសល់ក្នុងប្រទេសអាហ្វហ្គានីស្ថានប្រហែល 3,500 នាក់ នឹងត្រូវដកចេញត្រឹមថ្ងៃទី 11 ខែកញ្ញា ដើម្បីបញ្ចប់«សង្គ្រាមឥតទីបញ្ចប់»របស់សហរដ្ឋអាមេរិក។
ឧសភា 2021 - បច្ចុប្បន្ន
ក្រុមតាលីបង់ពង្រីកដែនដីគ្រប់គ្រង
ក្រុមប្រយុទ្ធតាលីបង់ បានដណ្តើមកាន់កាប់តំបន់ជាច្រើនយ៉ាងឆាប់រហ័សទូទាំងប្រទេសអាហ្វហ្គានីស្ថាន ដោយបានកាន់កាប់ជិតពាក់កណ្តាលនៃតំបន់ជាង 400។
2 កក្កដា
សហរដ្ឋអាមេរិកផ្ទេរការកាន់កាប់អាកាសយានដ្ឋាន Bagram
សហរដ្ឋអាមេរិកបានផ្ទេរការកាន់កាប់អាកាសយានដ្ឋាន Bagram ឱ្យស្ថិតនៅក្រោមការគ្រប់គ្រងរបស់យោធាអាហ្វហ្គានីស្ថានវិញ បន្ទាប់ពីទាហានអាមេរិកចុងក្រោយកំពុងត្រៀមខ្លួនដកចេញ។ យោធាអាមេរិកប្រកាសថា ខ្លួនបានដកកម្លាំងជិត 90 ភាគរយ ហើយការដកកម្លាំងទាំងស្រុងរំពឹងថា នឹងចប់សព្វគ្រប់ ត្រឹមថ្ងៃទី 31 ខែសីហានេះ។
5 កក្កដា 2021
ក្រុមតាលីបង់ថា ពួកគេអាចសើ្នជាសំណើសន្តិភាពជាលាយលក្ខណ៍អក្សរមួយ ដល់រដ្ឋាភិបាលអាហ្វហ្គានីស្ថាន ត្រឹមខែសីហា។
21 កក្កដា 2021
ក្រុមបះបោរតាលីបង់គ្រប់គ្រងជាងពាក់កណ្តាលនៃស្រុកទាំងអស់ក្នុងប្រទេសអាហ្វហ្គានីស្ថាន ក្នុងទ្រង់ទ្រាយដ៏ធំនិងល្បឿនដ៏លឿន នេះបើយោងតាមមេបញ្ជាការជាន់ខ្ពស់អាមេរិក។
6 សីហា 2021
ក្រុងដំបូងដែលបានធ្លាក់ក្រុមការគ្រប់គ្រងរបស់តាលីបង់
ក្រុង Zaranj នៅភាគខាងត្បូងអាហ្វហ្គានីស្ថាន ក្លាយជាខេត្តដំបូងគេបង្អស់ដែលធ្លាក់ក្រោមការគ្រប់គ្រងរបស់ក្រុមតាលីបង់ ក្នុងពេលជាច្រើនឆ្នាំក្រោយមក។ ក្រុងជាច្រើនទៀតក៏បានធ្លាក់ក្រោមការគ្រប់គ្រងរបស់តាលីបង់ប៉ុន្មានថ្ងៃបន្ទាប់មក រួមទាំងក្រុង Kunduz នៅភាគខាងជើងប្រទេស។
13 សីហា 2021
ក្រុមតាលីបង់បានគ្រប់គ្រងក្រុងធំៗចំនួនបួនទៀត ក្នុងពេលតែមួយថ្ងៃ រួមទាំងក្រុង Kandahar ដែលជាក្រុងធំបង្អស់ទី ២ និងជាទីសក្ការៈបូជារបស់ក្រុមតាលីបង់។
14 សីហា 2021
ក្រុមតាលីបង់បានកាន់កាប់ក្រុង Mazar-i-Sharif។ សហរដ្ឋអាមេរិកបញ្ជូនទាហានដើម្បីជួយជម្លៀសជនស៊ីវិលពីរដ្ឋធានីកាប៊ុល ខណៈប្រធានាធិបតីអាហ្វហ្គានីស្ថានលោក Ashraf Ghani ថាលោកកំពុងប្រឹក្សាយោបល់ជាមួយដៃគូជាតិនិងអន្តរជាតិ ពីជំហានបន្ទាប់ដែលត្រូវធ្វើ។
15 សីហា 2021
ក្រុមតាលីបង់ចូលកាន់កាប់ក្រុង Jalalabad ដោយមិនចាំបាច់ប្រយុទ្ធ បន្ទាប់មកកាន់កាប់រដ្ឋធានីកាប៊ុល
ក្រុមតាលីបង់បានកាន់កាប់ក្រុង Jalalabad ដោយមិនចាំបាច់ប្រយុទ្ធ។ មន្ត្រីក្រសួងមហាផ្ទៃអាហ្វហ្គានីស្ថានប្រកាសថា ក្រុមសកម្មប្រយុទ្ធតាលីបង់ចូលដល់រដ្ឋធានីកាប៊ុល ខណៈសហរដ្ឋអាមេរិកជម្លៀសមន្ត្រីការទូតពីស្ថានទូតរបស់ខ្លួនតាមឧទ្ធម្ភាគចក្រ។
17 សីហា 2021
ក្រុមតាលីបង់ពង្រឹងការគ្រប់គ្រងរបស់ខ្លួននៅអាហ្វហ្គានីស្ថាន
ក្រុមតាលីបង់សន្យាថានឹងគោរពសិទ្ធិស្ត្រី «តាមច្បាប់សាសនាឥស្លាម» ហើយថានឹងបង្កើតរដ្ឋាភិបាល«ឥស្លាមមួយសម្រាប់មនុស្សគ្រប់រូប» ខណៈពួកគេពង្រឹងការក្តោបក្តាប់អំណាចក្នុងប្រទេសអាហ្វហ្គានីស្ថានដែលឆ្លងកាត់សង្គ្រាមឥតឈប់ឈរ។
