ខ្ញុំគឺជាបណ្ណាធិការ អ្នកកែសម្រួល និងជាម្ចាស់កាសែតបោះពុម្ពប្រចាំសប្តាហ៍នៅក្នុងក្រុងដ៏តូចមួយនេះ។ ក្រុង Mount Carroll មានប្រជាជនរស់នៅប្រមាណ១៦០០នាក់។
យើងធ្វើសេចក្តីរាយការណ៍អំពីព័ត៌មានក្នុងសហគមន៍។ តាមរយៈអ្នកដែលខ្ញុំបានទាក់ទងជាមួយ ខ្ញុំអាចនិយាយបានថា មនុស្សជាច្រើននៅក្នុងសហគមន៍និងនៅក្នុងប្រទេសយើង មានឥរិយាបថបែបមិនទុកចិត្តលើអ្វីទាំងអស់។ ដោយសារតែពួកគេមិនជឿទុកចិត្តលើព័ត៌មានដែលផ្សព្វផ្សាយតាមបណ្តាញសង្គម នោះពួកគេក៏មិនជឿលើសេចក្តីរាយការណ៍របស់បណ្តាញផ្សព្វផ្សាយព័ត៌មានជាតិ និងកាសែតធំៗ ដូចជាកាសែត the New York Times កាសែត the Washington Post ឬកាសែត the Chicago Tribute ដែរ។ ព័ត៌មានទាំងនោះធ្វើឲ្យពួកគេមានមន្ទិលសង្ស័យ។
មានមនុស្សនិយាយលេងសើចដាក់ខ្ញុំថា៖ «អូ ព័ត៌មាននេះ ជាព័ត៌មានប្រឌិតមែនទេ Bob?» ឬអ្នកខ្លះនិយាយថា៖ «តើធ្វើដូចម្តេចទើបខ្ញុំអាចដឹងបានថា ព័ត៌មាននេះមិនបានកែប្រែពីព័ត៌មានពិត»។ ពួកគេនិយាយលេងសើចអំពីរឿងនេះ។ ពួកគេទំនងជានិយាយតៗគ្នាអំពីព័ត៌មានជាតិ ដែលពួកគេបានមើលតាមទូរទស្សន៍។
សម្រាប់ពលរដ្ឋនៅតំបន់ជនបទយើង ខ្ញុំយល់ថា វាដក់ជាប់នៅក្នុងខួរក្បាលយើងទៅហើយ ដែលថា នៅថ្នាក់ជាតិ ពួកគេមិនច្បាស់ ថាគួរជឿឬមិនជឿលើព័ត៌មានទាំងនោះទេ។ ហើយការយល់ឃើញនេះ ក៏បានជ្រាបទៅដល់ថ្នាក់មូលដ្ឋាន ហើយជាលទ្ធផល ពួកគេមានមន្ទិលសង្ស័យ។ ខ្ញុំពិតជាមិនដែលឃើញស្ថានភាពបែបនេះនៅក្នុងសហគមន៍យើងពីមុនមកទេ ក្រៅពីការនិយាយលេងសើចនោះ។
ទោះបីវាគ្រាន់តែការនិយាយលេងសើច ប៉ុន្តែវានៅដក់ជាប់ក្នុងការគិតរបស់ពួកគេ។ ពួកគេគិតពីបញ្ហានោះ។ ហើយយើងចង់ដឹងថា តើបញ្ហានេះនឹងចាក់ឫសដល់កម្រិតណា។ ខ្ញុំយល់ថា មនុស្សម្នានឹងផ្តោតលើព័ត៌មានប្រឌិតនេះ៕