នេះគឺជាក្រុង Tampico រដ្ឋ Illinois ដែលជាទីកំណើតរបស់លោកអតីតប្រធានាធិបតី Ronald Reagan។ ខ្ញុំមិនយល់ស្រប១០០ភាគរយ នឹងអ្វីដែលលោកបានធ្វើនោះទេ។ ប៉ុន្តែ នៅទីនេះ យើងមានមោទនភាពចំពោះរូបលោក។
ខ្ញុំអាយុ ៥៨ឆ្នាំ។ ខ្ញុំមិនដែលឃើញប្រទេសជាតិយើង បែកបាក់គ្នាយ៉ាងដូច្នេះទេ ក្នុងរយៈពេល៣ឆ្នាំនេះ។ មនុស្សនាំគ្នាប្រកែកគ្នារឿងពូជសាសន៍។ យើងទាំងអស់គ្នា គឺជាពលរដ្ឋអាមេរិកាំង។ បើសិនជាយើងទាំងអស់គ្នារស់នៅក្រោមច្បាប់តែមួយ នោះយើងនឹងមិនបែកបាក់គ្នាដូច្នេះទេ។
យើងទាំងអស់គ្នាបារម្ភ តែខ្ញុំនឹងមិនរើសអើងអ្នកទេ បើទោះអ្នកជាពលរដ្ឋអាមេរិកឡាទីន ឬអាមេរិកស្បែកខ្មៅក្តី។ យើងទាំងអស់គ្នាជាពលរដ្ឋអាមេរិកាំង។ បើអ្នកជាពលរដ្ឋអាមេរិកាំង នោះពូជសាសន៍របស់អ្នកមិនជាបញ្ហានោះទេ។ ខ្ញុំនឹងប្រាស្រ័យទាក់ទងជាមួយអ្នកដោយក្តីគោរព ឲ្យតែអ្នកគោរពខ្ញុំវិញដែរ។ បើសិនជាអ្នកចេញទៅប្លន់គេ នោះអ្នកមិនគោរពអ្នកដទៃទេ។ មែនអត់? ហើយបើអ្នកទៅបាញ់គេ នោះអ្នកក៏មិនគោរពអ្នកដទៃដែរ។ តើខ្ញុំគួរតែគោរពមនុស្សដែលប្លន់គេទេ? ខ្ញុំមិនគួរទេ។
មន្ត្រីប៉ូលិស និងច្បាប់យើងត្រូវបានវាយប្រហារ។ បើយើងមិនអាចអនុវត្តតាមច្បាប់ និងគោរពមន្ត្រីអនុវត្តច្បាប់ទេ ខ្ញុំគិតថា នេះដោយសារតែយើងមិនគោរពច្បាប់។
តើនេះជាសង្គ្រាមពូជសាសន៍ឬ? វាបានក្លាយជាសង្គ្រាមពូជសាសន៍ទៅហើយ។ តើយើងអាចផ្លាស់ប្តូរវាទេ? អ្វីដែលយើងអាចធ្វើបាននោះគឺ សង្ឃឹមនិងបន់ស្រន់ថា យើងអាចធ្វើបាន៕