តាមផ្លូវជនបទមួយដែលមានទៅដោយស៊ីទែននិងម៉ាស៊ីនបូមទឹក ក្រោមពន្លឺព្រះអាទិត្យពេលសិសិររដូវ គេឃើញបុរសម្នាក់ធ្វើការនៅលើកៅអីមួយក្នុងយានដ្ឋានបើកចំហមួយ។
បុរសវ័យ៥៧ឆ្នាំរូបនោះនិយាយថា៖ «ខ្ញុំគ្រាន់តែធ្វើការងារបន្តិចបន្តួចប៉ុណ្ណោះឥឡូវនេះ។ គ្រាន់តែជួយឲ្យខ្ញុំបានការងារធ្វើនិងមានប្រយោជន៍នឹងគេតែប៉ុណ្ណឹង»។ លោកបន្តថា លោករកប្រាក់ចំណូលបានតិចតួចប៉ុណ្ណោះពីការលក់ដែកអេតចាយ ដែលជាគ្រឿងឧបករណ៍ខូចៗលែងប្រើការបាន។
រហូតមកទល់នឹងពីរឆ្នាំកន្លងមកនេះ លោកធ្លាប់ជាកសិករយកទឹកដោះគោម្នាក់ ដែលត្រូវយកទឹកដោះគោពីសត្វគោ២៤ក្បាល។ ប៉ុន្តែដូចមនុស្សមួយចំនួននៅកសិដ្ឋានតូចៗ វាមានការលំបាកក្នុងការតាមឲ្យទាន់ ដោយសារតែកសិដ្ឋានធំៗ ទម្លាក់ថ្លៃទាប ដែលធ្វើឲ្យកសិដ្ឋានតូចៗពិបាកប្រជែង។
អតីតកសិករយកទឹកដោះគោរូបនេះនិយាយថា កម្មវិធី Affordable Care Act ដែលជាកម្មវិធីធានារ៉ាប់រងសុខភាព ដែលក៏ត្រូវបានគេស្គាល់ថា Obamacare ផងដែរនោះ គ្រាន់តែធ្វើឲ្យស្ថានភាពអាក្រក់ជាងមុនប៉ុណ្ណោះ ដោយបានបង្ខំឲ្យលោកនិងមិត្តភក្តិរបស់លោកមួយចំនួន ចំណាយច្រើនជាងអ្វីដែលពួកគាត់អាចបង់ថ្លៃ សម្រាប់កញ្ចប់ធានារ៉ាប់រងសុខភាព ដែលពួកគេមិនចង់បាន។
អ្វីដែលពួកគេយល់ឃើញថា ជាគោលនយោបាយធ្ងន់ដៃរបស់រដ្ឋាភិបាលអស់រយៈពេលរាប់ទសវត្សរ៍នោះ បានបង្កឲ្យមានការខឹងសម្បារ និងមន្ទិលសង្ស័យ ចំពោះសមត្ថភាពរបស់កម្មវិធីធានារ៉ាប់រងសុខភាពនោះក្នុងការលើកកម្ពស់សុខុមាលភាពប្រជាជនអាមេរិកាំង។ នេះបើយោងទៅតាមសម្តីរបស់បុរសរូបនោះ ដែលមានទឹកមុខខឹងសម្បារខ្លាំង។ លោកបានបន្តថា ដូចប្រជាពលរដ្ឋនៅក្រុងមួយចំនួនដទៃទៀត ដែលបានបោះឆ្នោតឲ្យលោកប្រធានាធិបតីត្រាំ បន្ទាប់ពីធ្លាប់បានគាំទ្រលោក អូបាម៉ា ពីមុនមក ប្រជាពលរដ្ឋក្រុង Trempealeau លែងជឿទុកចិត្តអ្នកនយោបាយទូទៅដដែលៗតទៅទៀតហើយ។
លោកនិយាយថា៖ «ថវិកាទាំងអស់ចូលទៅទីក្រុងធំៗ ហើយប្រជាពលរដ្ឋទាំងអស់នៅជនបទនៅពេលនេះនិយាយថាពួកគេឆ្អែតឆ្អន់ហើយ»។
សម្រាប់រូបលោក ការបោះឆ្នោតឲ្យលោកត្រាំគឺជាការបោះឆ្នោតជាចម្បងប្រឆាំងនឹងច្បាប់ថែទាំសុខភាព Obamacare។
ប៉ុន្តែលោកក៏បានទទួលស្គាល់ថា «មែន កម្មវិធីនោះក៏បានជួយខ្ញុំផងដែរ»។
កាលពីពីរឆ្នាំមុន លោកត្រូវទទួលការវះកាត់ជាបន្ទាន់ ដើម្បីព្យាបាលដំបៅនៅលើជើងរបស់លោក ដែលជាដំបៅធ្ងន់ធ្ងរនិងតម្រូវឲ្យលោកត្រូវឈប់ពីការងារ។ ប្រាក់ចំណូលចម្បងរបស់លោកនៅពេលឥឡូវនេះគឺ មូលប្បទានប័ត្រផ្តល់ដោយរដ្ឋាភិបាលសម្រាប់ជនពិការ។
លោកនិយាយថា៖ «ខ្ញុំស្ថិតក្រោមកម្មវិធីថែទាំសុខភាព Obamacare បានពីរសប្តាហ៍ មុនពេលខ្ញុំទទួលបានការវះកាត់»។
អតីតកសិកររូបនេះស្ថិតនៅក្នុងចំណោមមនុស្សជាង២០០.០០០នាក់ ដែលពីមុនមកមិនមានប័ណ្ណធានារ៉ាប់រងសុខភាពទេនៅរដ្ឋ Wisconsin តែឥឡូវនេះ មានប័ណ្ណធានារ៉ាប់រងសុខភាព ហើយលោកស្ថិតក្នុងចំណោមមនុស្សជាង២.០០០.០០០នាក់ ដែលសម្រាប់ពេលបច្ចុប្បន្ន ទទួលបានសោរហ៊ុយចំណាយបន្ថែមពីក្រុមហ៊ុនធានារ៉ាប់រងផ្តល់ឲ្យ។ នេះបើយោងតាមស្ថិតិរដ្ឋាភិបាល។
ប៉ុន្តែលោកនិយាយថា មនុស្សដទៃទៀតដែលលោកស្គាល់ស្ទើរតែទាំងអស់ មិនបានកើតជំងឺធ្ងន់ធ្ងរឬរងរបួសណាមួយទេ ចាប់តាំងពីពួកគេបានចុះឈ្មោះក្នុងកម្មវិធីធានារ៉ាប់រងសុខភាព ដែលតម្រូវដោយរដ្ឋាភិបាលក្នុងតម្លៃដ៏ថ្លៃ។
លោកបានបន្ថែមថា សូម្បីតែខ្លួនលោកផ្ទាល់ដែលត្រូវការគម្រោងធានារ៉ាប់រងនោះ វាគួរតែជាជម្រើសចេញពីខ្លួនលោក មិនមែនពីរដ្ឋាភិបាលនោះទេ។
ដោយមានការព្រួយបារម្ភខ្លាចក្រែងមានគេតាមដាន លោកបដិសេធមិនប្រាប់ឈ្មោះទេ តែលោកបានប្រាប់យើងថា កុំឲ្យយើងស្តាប់ប្រជាជនដទៃទៀត ដែលនិយាយថា ពួកគេគាំទ្រលោកត្រាំ សម្រាប់ហេតុផលផ្សេង ក្រៅពីច្បាប់ថែទាំសុខភាព Affordable Care។
លោកនិយាយថា៖ «ស្រូវ អង្ករ និងសាច់លែងមានតម្លៃហើយ»។ លោកលើកឡើងដូចនេះ ដើម្បីបកស្រាយពីពេលថ្លៃផលិតផលកសិកម្មធ្លាក់ចុះ ហើយតំបន់ដែលលោករស់នៅរងគ្រោះ។ លោកបានបន្តថា៖ «ហើយឥឡូវនេះ ពួកគេចង់ឲ្យយើងទិញប័ណ្ណធានារ៉ាប់រងសុខភាពទៀត?»