Gra të ndryshme mblidhen çdo javë në Qendrën Komunitare të Fultonit, në Ilinois, për të shkëmbyer dy fjalë dhe për të qepur apo për të punuar me grep. Duke qenë se kanë qëndrime të ndryshme politike, ato e shmangin këtë temë.
Nën gumëzhimën e makinave qepëse, gra të ndryshme mblidhen çdo javë në Qendrën Komunitare të Fultonit, në Ilinois, për të shkëmbyer dy fjalë dhe për të qepur apo për të punuar me grep. Duke qenë se kanë qëndrime të ndryshme politike, ato e shmangin këtë temë.
Linda Ebersole, nga qyteti Rock Falls, shkëputet pak nga puna dhe thotë se e pa me kujdesin secilin nga të dy kandidatët, por asnjëri prej tyre nuk i pëlqeu. “Në fund fare, na duhej të zgjidhnim midis atë që ishte më pak djallëzor”, thotë ajo.
Ebersole shton se republikani Donald Trump ishte i paparashikueshëm, kështu që e pati të vështirë t’u besonte atyre që ai thoshte, por kandidatja demokrate Hillary Clinton kishte treguar në shumë raste se nuk mund t’i zije besë. Ajo kishte treguar gjithashtu mungesë respekti për votuesit, përfshirë përcaktimin që u bëri ajo ndjekësve të Trumpit si “një tufë mjeranësh”.
Linda Ebersole, nga qyteti Rock Falls, Ill., bën një pushim të shkurtër nga punëdorja në Qendrën Komunitare të Fultonit, Ill.
Në fund, infermierja në pension votoi për Presidentin Trump, sepse ai dukej i sinqertë në dëshirën për të sjellë ndryshimin. Ajo mendon se mendiat kombëtare po e pengojnë atë të vazhdojë rrugën që ka nisur. “Sa herë që ka ndonjë dyshim se Trumpi mund të ketë bërë diçka gabim, ata e marrin atë “qime” dhe e bëjnë “tra”, thotë Ebersole. Këto padrejtësi karshi Presidentit të ri e shtyjnë ta mbështesë atë akoma dhe më shumë.
“Nëse Trumpi do të bënte tre gjëra të mira dhe një të keqe, media do t’i bënte jehonë kësaj të fundit,” thotë Linda. “Mediat kombëtare tregohen të njëanshme me Presidentin Trump.”
Ebersole i ndjek lajmet në televizor si dhe lexon gazetën lokale, por që prej zgjedhjeve ka filluar të ndjekë më shumë Fox News, televizionin që ndjek linjën e konservatorëve, sepse sipas saj, lajmet e këtij kanali janë më të balancuara.
Edhe Presidenti Trump është fans i mediave pro administratës së tij dhe mediat që mbajnë kryesisht një qëndrim kritik ndaj tij, i cilëson “lajme të rreme.”
Ebersolen e shqetëson numri i lartë i të rinjëve që nuk u kushtojnë rëndësi lajmeve. Ata parapëlqejnë programet argëtuese, të cilat vënë në lojë konservatorët dhe rrallë shënjestrojnë liberalët.
Imigracioni është një çështje me rëndësi të madhe kombëtare, ndonëse në Kontenë Whiteside ka shumë pak imigrantë. Linda thotë se kur këta të fundit vijnë në Shtetet e Bashkuara në mënyrë të ligjshme dhe janë të gatshëm të integrohen, amerikanët duhet t’i presin krahëhapur, ashtu siç ka ndodhur me shumë specialistë të fushës së mjekësisë që tashmë janë vendosur në Amerikë. Por Ebersole shton se ajo vetë ka pasur në disa raste një përplasje kulturore me imigrantët muslimanë.
Një herë ajo ishte në supermarket dhe një grua me shami injoroi radhën dhe doli përpara saj. Linda foli me më të rinjtë që e shoqëronin gruan, por ata thjesh ngritën supet. Ishte matriarkja e familjes dhe mendonte se nuk i takonte të priste në radhë”, thotë Ebersole. “Janë ata që kanë ardhur këtu dhe duhet të përshtaten sa më shumë të jetë e mundur. Duhet të asimilohen në vendin ku kanë ardhur me dëshirën e tyre.”
Por nga ana tjetër, sipas Ebersoles, Shtetet e Bashkuara nuk duhet të pranojnë imigrantë që shkelin ligjet e imigracionit, duke qëndruar në SHBA edhe pas skadimit të vizës apo duke hyrë në vend ilegalisht. “Duhet ta bëjnë ligjërisht,” tha ajo.
Ebersole ishte gjithashtu dakord me ligjin e Presidentit Trump për ndalimin e përkohshëm të imigrantëve nga gjashtë vendet me shumicë myslimane, për shkak të rrezikut që vjen nga terrorizmi. Ajo shton se duhet të ketë një kufi imigrantësh që mund të pranohen të hyjnë, nuk mund të vijnë të gjithë.
Vlerat e përbashkëta
Ebersole thotë se njerëz që u përkasin bindjeve të ndryshme politike kanë shumë ide praktike.
Ish Sekretarja e Shtetit, Hilari Klinton, ka lindur dhe është rritur në Ilinois, sikurse dhe një ndër heronjtë e konservatorizmit modern, ish Presidenti Ronald Reagan, i cili lindi në Kontenë Whiteside, në qytetin Tampico dhe u rrit një konte më në lindje, në Dixon, Ilinois. Disa të afërm të tij prehen pikërisht në Varrezën e Fultonit.
Pavarësisht nga ndasitë që nxorën në pah zgjedhjet e fundit, Ebersole beson se të dy politikanët, edhe pse rrënjësisht të ndryshëm, ndanin shumë ide bazike të përbashkëta.
“Ka shumë vlera të përbashkëta me të cilat çdo votues bie dakord,” thotë Linda. “Është kjo zonë që ushqen vlera të tilla si familja. Dhe këto vlera janë më të rëndësishme se ajo që bëjnë politikanët.”