Vendi i sulmeve të 11 shtatorit (Kuota Zero) – Në atë kohë dhe tani

Memoriali i ri në veri

Pishinat reflektuese të Veriut dhe Jugut përmbajnë ujëvarat më të mëdha të bëra nga njeriu në Amerikën e Veriut, secila duke zbritur nëntë metra në një pellg katror. Arad thotë se pishinat përfaqësojnë "mungesën e bërë të dukshme", me ujë që rrjedh në boshllëqe që nuk mund të mbushen kurrë.

Barrierat prej bronzi që rrethojnë pishinën e Veriut mbartin emrat e viktimave të 11 shtatorit, përfshirë ata që ishin në Kullën 1 dhe në fluturimin 11 të American Airlines që rrëmbyesit përplasën në ndërtesë, si dhe ata që u vranë në një sulm terrorist me bombë më 26 shkurt 1993, në Kullën e Veriut.

Strukturat e reja në Sheshin e Memorialit të Ri

Më shumë se 400 rrënjë lis i bardhë rrethojnë dy pishinat reflektuese të sheshit të memorialit.

Dy ndërtesa të vogla gjithashtu janë të vendosura në gjurmët e hotelit të mëparshëm. Kompania e arkitektit amerikan të peizazhit Peter Walker, e cila projektoi sheshin, thotë se dy ndërtesat lejojnë qarkullim ajri rreth objekteve nën shesh. Ai thotë se ato përmbajnë gjithashtu hapësira shërbimi dhe një post sigurie.

Kulla e re 2

Nivelet nëntokësore të Kullës 2 dhe superstruktura përfundohen deri në nivelin e rrugës në dhjetor 2012.

Por ndërtimi u ndal në vitin 2013 nga kompania Silverstein Properties derisa të gjente qeramarrës për kullën e re.

Një strukturë metalike që rrethon zonën ku ndërtimet janë pezulluar të Kullës 2, bëhet një vend popullor turistik, falë muraleve shumëngjyrëshe të pikturuara në pjesën e jashtme të saj.

Të kontraktuar nga kompania Silverstein Properties dhe Autoriteti Portual i Nju Jorkut dhe Nju Xhërsit në qershor 2018, artistët e rrugës pikturojnë murale për të zbukuruar zonën me imazhe frymëzuese dhe ata e përfundojnë projektin në shtator të atij viti. Një Kopsht Birre Oculus hapet në anën e Church Street në tetor 2020.

Qendra e re e Transportit Oculus

Stacioni Oculus i Qendrës së Transportit PATH hapet për publikun më 3 mars 2016. Mbulesa e bardhë e veçantë e stacionit përmban dy harqe të ngjashme me krahë që ngjiten lart, të mbështetur mbi dy harqe. Ajo u projektua me qëllim që t’i ngjasonte një pëllumbi të lëshuar nga duart e një fëmije, sipas arkitektit Calatrava. Mes harqeve është një dritare e ngushtë që hapet në ditët me mot të mirë dhe çdo vit në 11 shtator.

Kostoja prej 4 miliardë dollarësh e Qendrës së Transportit e bën atë stacionin më të shtrenjtë të trenave në Shtetet e Bashkuara, pothuajse dyfish nga buxheti fillestar prej 2.2 miliardë dollarësh. Stacionit gjithashtu i duhen shtatë vjet më shumë për t'u përfunduar sesa ishte planifikuar fillimisht.

Dy nga katet e stacionit nën nivelin e rrugës strehojnë një pjesë të qendrës tregtare Westfield World Trade Center, të menaxhuar nga kompania franceze e pasurive të patundshme komerciale Unibail-Rodamco-Westfield (URW). Ajo zëvendëson një qendër nëntokësore me një kat të vetëm të shkatërruar më 11 shtator, nën kompleksin origjinal të Qendrës Botërore të Tregtisë.

Kulla e re 7

Parku i ri familjar Silverstein

Parku i ri familjar Silverstein, me formë trekëndore në pjesën lindore të gjurmës origjinale të Kullës 7, përfundohet në vitin 2014.

I projektuar nga arkitekti i Nju Jorkut, Ken Smith, parku prej 1390 metrash katrorë përmban një shatërvan të rrumbullaktë të rrethuar nga pemë dhe bimësi. Do të shërbejë si një mjedis çlodhjeje për punonjësit e zyrave, vendasit dhe vizitorët.

E vendosur fillimisht në qendër të shatërvanit të parkut ndodhej skulptura "Lulja ballon" e artistit amerikan Jeff Koons. Skulptura prej çeliku e lartë 2.7 metra, e cila u shndërrua në simbolin e këtij parku, u hoq në tetor 2018 për restaurim, ndërkohë që shatërvani po riparohej. Shatërvani filloi të funksionojë sërish më vonë, por kompania Silverstein Properties i tha Zërit të Amerikës se skulptura ishte ende duke u restauruar në Evropë.

Parcelë toke e rezervuar për WTC 5

Dhjetë vjet pasi autoritetet përfunduan shembjen e godinës së dëmtuar më 11 shtator të Deutsche Bank, pjesa jugore e perimetrit të saj mbetet e pazhvilluar në vitin 2021, pasi planet për ndërtimin e një kulle të ardhshme të Qendrës Botërore Tregtare 5 presin miratimin nga disa agjencive qeveritare. Korporata e Zhvillimit të Manhatanit të Poshtëm ruan pronësinë e truallit të njohur si zona 5, e cila kufizohet nga rrugët Washington, Albany dhe Greenwich.

Pasi Sheshi Kombëtar i Memorialit të 11 Shtatorit u hap për publikun në shtator 2011, LMDC lejoi që pjesa jugore e zonës 5 të përdorej si zonë pritjeje për vizitorët me bileta për në shesh, i cili është i rrethuar nga një gardh. Zona e pritjes u lirua më 15 maj 2014, kur u mbajt një ceremoni dedikimi për Muzeun Kombëtar të 11 shtatorit dhe gardhi i Sheshit të Memorialit u hoq, duke u dhënë vizitorëve për herë të parë qasje falas në shesh.

Korporata LMDC vendosi ta zhvillojë pjesën jugore të liruar të zonës 5 në një park të përkohshëm si pjesë e një projekti me “Downtown Alliance”, një grup jofitimprurës që ndihmon bizneset e Manhatanit të Poshtëm. Parku u hap për publikun më 2 shtator 2014. Parku i quajtur Albany Street Plaza, përmbante stola, pemë dhe një pikturë murale shumëngjyrëshe në një mur që e ndan atë nga një stacion policor.

LMDC lejoi Autoritetin Portual të Nju Jorkut dhe Nju Xhërsit të ndërtojë zyra të përkohshme në pjesën veriore të zonës 5 në vitin 2014.

Në një hap të madh drejt realizimit të vizionit të një kulle WTC 5, Guvernatori i Nju Jorkut Andrew Cuomo, korporata LMDC dhe Autoriteti Portual bënë një kërkesë për propozime më 26 qershor 2019, duke kërkuar plane nga ndërtuesit për të dhënë me qera ose për të blerë zonën dhe për të ndërtuar një godinë tregtare ose për përdorime të ndryshme.

LMDC dhe Autoriteti Portual vendosën më 11 shkurt 2021, për të hyrë në negociata ekskluzive me një konsorcium ndërtuesish që propozoi marrjen me qera të zonës dhe ndërtimin e një kulle kryesisht banimi. Kontrata 99-vjeçare do të kërkojë nga ndërtuesit që të paguajnë qera direkt tek Autoriteti Portual.

Konsorciumi drejtohet nga firma amerikane Silverstein Properties dhe firma kanadeze Brookfield Properties dhe përfshin dy firma më të vogla me seli në Nju Jork, Omni New York dhe Dabar Development Partners.

Autoriteti Portual i tha Zërit të Amerikës se negociatat me konsorciumin për finalizimin e qerasë për WTC 5 vazhdonin ende në gusht dhe nuk dihet se kur ka të ngjarë të përfundojnë.

Kisha Ortodokse Greke e Shën Nikollës dhe Faltorja Kombëtare

Gati 20 vjet pasi kisha origjinale u shkatërrua më 11 shtator, ndërtimi i një Kishe të re Ortodokse të Shën Nikollës dhe Faltores Kombëtare është pranë përfundimit në një zonë aty pranë. Ajo është projektuar nga arkitekti spanjoll Santiago Calatrava, të cilit Kryepeshkopata Ortodokse Greke e Amerikës së pari i besoi të hartonte planet për ndërtesën e re në vitin 2012.

Projekti i Calatravasit, që u bë i njohur në vitin 2013, parashikon një ndërtesë prej mermeri të bardhë me kubé të rrethuar nga katër shtylla, të modeluara sipas Hagia Sophia të Stambollit dhe Kishës së Shpëtimtarit të Shenjtë në Chora, dy ish-kisha ortodokse greke më vonë të shndërruara në xhami nga autoritetet turke në vitin 2020. E vendosur në rrugën Liberty 130 në anën lindore të Parkut të ri të Qendrës Botërore të Tregtisë, ndërtimi i projektit të vlerësuar prej 20 milionë dollarësh filloi me një ceremoni hapëse më 18 tetor 2014 dhe arriti fazëne ndërtimeve të mbulesës dhe vendosjes së një kryqi të përkohshëm në kupolën skeletore të ndërtesës më 29 nëntor 2016.

Autoriteti Portual i Nju Jorkut dhe Nju Xhërsit, i cili ra dakord të lejojë kryepeshkopatën të rindërtojë kishën në rrugën Liberty 130, si pjesë e një marrëveshjeje të shkëmbimit të tokës në vitin 2011, nënshkroi një marrëveshje tjetër më 21 gusht 2017, për t'ia dhënë me qera zonën kryepeshkopatës për 198 vjet. Marrëveshja e re përcakton qeranë për kishën në 1 dollar në vit dhe i jep arqipeshkëvisë mundësinë për të blerë zonën në çdo kohë gjatë qerasë, gjithashtu për një tarifë nominale. Kryepeshkopata pranon të lejojë Autoritetin Portual të ruajë pronësinë e zonës në mënyrë që agjencia qeveritare të mbajë përgjegjësinë për sigurimin e lejeve dhe miratimeve rregullatore gjatë procesit të ndërtimit.

Por puna e ndërtimit ndaloi në dhjetor 2017 kur kompania suedeze e ndërtimit Skanska tha se kryepeshkopata nuk po e paguante. Kryepeshkopata zbuloi muaj më parë se kishte një deficit të rëndë financiar që ishte akulumuar prej vitesh dhe punësoi firmën PricewaterhouseCoopers në prill 2018 për të hetuar financat e projektit të kishës dhe kostot e mëdha.

Hetuesit arritën në përfundim në tetor të vitit 2018 se nuk kishte dëshmi për mashtrime ose keqpërdorim fondesh nga anëtarët e kryepeshkopatës. Kryepeshkopata pranoi gjithashtu thirrjen e hetuesve për krijimin e një njësie të re të pavarur, "Miqtë e Shën Nikollës", për të mbledhur fonde për të përfunduar projektin e ngecur.

Grupi Miqtë e Shën Nikollës mblodhi miliona dollarë shtesë nga donacione private, duke bërë të mundur që ndërtimi të rifillonte më 3 gusht 2020. Fondet e mbledhura arrijnë në 95 milionë dollarë në qershor 2021, pothuajse pesë herë kostos së parashikuar fillimisht për rindërtimin.

Në një deklaratë për Zërin e Amerikës, kryepeshkopata tha se pjesa e jashtme e kishës pritet të përfundojë deri në mbrëmjen e 10 shtatorit 2021, kur do të ndriçohet nga brenda për herë të parë.

Kryepeshkopata thotë se ndërsa punimet e brendshme do të vazhdojnë deri në vitin 2022, një ceremoni e hapjes së dyerve të kishës do të mbahet më 2 nëntor 2021, që të përkojë me një vizitë në Nju Jork të Patriarkut Ekumenik Bartolomeu I i Kostandinopojës me bazë në Turqi.

Pavioni i Muzeut të Ri

Muzeu i ri Përkujtimor i 11 Shtatorit u inaugurua përmes një ceremonie më 15 maj 2014, drejtuar nga presidenti i atëhershëm Barack Obama dhe kryetari i Memorialit të 11 Shtatorit Michael Bloomberg. Muzeu u hap për publikun më 21 maj pas tetë vitesh ndërtimi, kostoja e të cilit, përfshirë sheshin e Memorialit që u hap në vitin 2011, arrin në 700 milionë dollarë. Kompleksi i muzeut dhe memorialit është më i shtrenjti që është ndërtuar ndonjëherë në Shtetet e Bashkuara.

Pavioni i hyrjes mbi tokë është projektuar nga firma arkitekturore norvegjeze Snøhetta, ndërsa hapësirat e muzeut nën tokë janë projektuar nga firma arkitekturore Davis Brody Bond me seli në Nju Jork. Hapësirat e saj muzeale janë projektuar nga firmat e qytetit të Nju Jorkut Thinc Design and Local Projects, LLC dhe Layman Design me seli në Illinoi.

Muzeu ka 10,200 metra katror hapësirë kushtuar 11 Shtatorit dhe shpërthimeve terroriste të 26 shkurtit 1993, në Qendrën Botërore të Tregtisë përmes objekteve, imazheve, historive personale dhe teknologjisë ndërvepruese. Vizitorët zbresin në një hapërisë të madhe nëntokësore ku ka qenë kompleksi origjinal i WTC. Dy hapësirat kryesore të muzeut janë Salla Përkujtimore që përmban një mur me vargje të poetit të lashtë romak Virgjil ku thuhet "Asnjë ditë nuk do t'ju fshijë nga kujtesa e kohës;" dhe Salla e Fondacionit që përmban një pjesë të murit fillestar të WTC-së, një mur mbrojtës të ndërtuar për të mbajtur jashtë ujërat e lumit Hadsën aty pranë.

Pika të tjera kryesore të muzeut përfshijnë Shkallët e të Mbijetuarëve, një shkallë që ishte pjesë e sheshit origjinal të WTC dhe u siguroi shpëtim punonjësve të zyrave që të largoheshin nga kompleksi WTC më 11 shtator; dhe Kolona e Fundit, një copë çeliku e WTC që ishte e fundit që u hoq nga Kuota Zero në maj 2002.

Në kompleksin nëntokësor, një element që zgjoi polemika është një dhomë me eshtrat e paidentifikuara të viktimave nga sulmet e 11 shtatorit. Ajo ndodhet prapa murit të Sallës Përkujtimore të muzeut dhe është i kalueshëm vetëm për stafin e Zyrës së Shefit të Ekzaminuesit Mjekësor të Qytetit të Nju Jorkut. Një hapësirë private ekskluzivisht për të afërmit e viktimave të 11 shtatorit e quajtur Dhoma e Reflektimit është pranë depove. Në kohën e hapjes së muzeut, dhoma kishte rreth 8,000 pjesë eshtrash njerëzore që ekzaminuesit mjekësorë kanë për detyrë të përpiqen të identifikojnë si pjesë e një operacioni të papërfunduar në një laborator të ADN-së.

Debati gjithashtu është i zjarrtë mbi çmimin origjinal të biletës së muzeut prej 24 dollarësh për të rriturit. Disa pjesëtarë të familjeve të viktimave të 11 shtatorit e quajnë atë të tepruar. Përkrahësit thonë se çmimi i biletës për të rritur, i cili është rritur në 26 dollarë, është në përputhje me përmasat dhe vlerën e muzeut dhe kompleksit përkujtimor, shpenzimet e funksionimit dhe menaxhimit të të cilit për vitin 2019 arrijnë në 73 milionë dollarë.

Sipas zyrtarëve të Memorialit dhe Muzeu Kombëtar të 11 Shtatorit më shumë se 17 milionë njerëz e kanë vizituar muzeun që nga hapja e tij në maj 2014. Ata thonë se më shumë se 50 milionë njerëz nga e gjithë bota kanë vizituar sheshin e Memorialit që kur u hap në vitin 2011.